Monday, June 7, 2010

Tsawra Ai Jinghpaw Wunpawng Amyu Sha Ni E....

Daini anhte buga ginra ni hta Amyu W.P sha ni a lapran, Mungmasa,
Hpyen masa n hkrak ai, mayak a majaw, Tara Rapra lam nnga ai a majaw,
byin hkrum hkam mana sha taw nga ai, Ruyak Tsinyam, Myithkyi Lit li,
Matsan Jamjau Hkrum sha nga ga ai. Raitim, myit mada shara nnga mat
ai, kamhpa shara n nga mat sai ni zawn n rai mat ga!!

Isrela Amyu masha ni, shawng de sit ngu yang mung nawnghkyeng hka din
mat, hpang de gaw shanhte hpe hkan shachyut sat ai Egutu hpyen hpung
ni du wa rai, hpa galaw na machyung machyang n chye mat, myit hkyi ba
lit li, hkrit tsang kadau kadap rai, hprawng yen koi na shara, lam
mahkrun n mu, n nga rai, Ginchyum Chyat hkrum ai ten hta Isrela Amyu
Masha ni hpe Nawng Hkyeng Hka Ga-ang Brang galaw nna shawng man de
matut koi yen hprawng lawt sa wa lu na lam hpe hpaw lajang ya dat ai
KARAI, Egutu Hpyen ni hpe Summui, Wan Shinglet hte gaup lam pat
shingdang makawp maga ya ai KARAI, Sha na U Preng jahkrat ya ai,
Shana e Wan Summui Wan Shadaw lajang ya let woi lakawn ai KARAI, lamu
Kasa ni....., Daini, Dai Yehowa Karai Kasang hpe hkap la kam sham nga
ai Anhte Jinghpaw Wunpawng Amyu Sha ni aq KARAI, YEHOWA KARAI KASANG
mung Rai nga ai hpe dum ga!!

Isrela Amyu Sha ni a makam Kaji kawa, Abraham a ga, Amyu sha ningbaw
Mawshe a ga, Yawshu a ga(Jan hpe jahkring da ai), Shawlamun Hkawhkam a
ga, David Hkawhkam a ga, Myihtoi ni a ga, kasa ni a ga etc..., hpe
madat ya ai Yehowa KARAI KASANG Rai Nga Ai hte maren, Daini Anhte
Jinghpaw Wunpawng Amyu Sha Ningbaw Ningla ni aq Ga hpe mung madat ya
na/ai Yehowa KARAI KASANG Rai Nga Ai Re!! Dai majaw daini anhte amyu
sha ni hpe makam wenyi lam hku nna, mungmasa, hpyen masa lam hku nna,
Htunghking lam masa hku nna, sut masa lam hku nna hte laika hpaji lam
masa hku nna, hte kaga lam masa amyu myu hku nna woi awn nga ai
ningbaw ningla myitsu du salang,Nu Wa, Ramma Hpunau Ningbaw ni a Ga,
ni hpe mung Yehowa Karai Kasang gaw madat ya na re. Myit yu na lam
langai gaw, Dai Ningbaw ni aq Ga, Myit masin salum ni gaw Dai madu
Yehowa Karai Kasang myit dik myit ra ai, hkap la ya lu ai Ga, Masin
Salum, Arawn Alai ni rai nga, madu nga nga ai kun? Dai Madu Karai
Kasang hta n gun la ga! Myit sawn dinglik sharai la na grai ahkyak nga
sai.

Anhte Amyu sha ni aq ASAK, Shawng lam Sak Hkrung lam Maq hkra gaw Dai
Madu Yehowa Karai Kasang a lata kaw sha nga nga ai, Myen hpyen wa a
lata kaw N-RE!!! Dai hpe a dum nga ga. Myit masin lungpa hta bang da
ga. Nu Wa Hpu Nau ni e....

Myen Hpyen wa e.., Tara n lang diplu dip sha, rim zingri, htawng bang
sharen da, n hkru n shawp ai Zai ladat amyu myu hte mahkam hkam,
katsi majan, kahtet majan hpyen man wawq kasat nna Si Htum Mat na,
Grit mat, Yawm mat wa na Jinghpaw Wunpawng Amyu Sha ni N-RE!!! Moi,
Shaning (50) ning laman htum mat na ngu ai amyu sha ni re. Myen
Hkawhkam..Myintung wa, Shi ntawt na Gwi madang ram pyi n sawn hkrum
ai, gwi a madang pyi nnga ai hku shagrit hkrum ai, masat hkrum ai
Kachin Amyu sha ni re. Raitim, daini Mungkan jut shara shagu chyam bra
nga pra, galu kaba wa saga ai. Laika lu ai amyu tai nga saga ai.
Mungkan hta laklai shai ai htunghking, Manau nau ai amyu sha ni hku
nna, Mungkan hta myiman dandawng nga saga ai, Karai Kasang a lagaw
Hkang ai Jinghpaw Wunpawng Amyu shani rai nga ga ai. Raitim, Karai
Kasang aq sunghtum ai Ja Chyum Mungga lam hku nna asak n hkrung, n sa,
ja Chyum Mungga hte Yehowa K.K hpe shingdu tawn let sak hkrung ai
shani chyawm gaw..., grit mat, htum mat, mat mat ai Amyu sha ni tai
na, ga lahtum n shut rai nga ai hpe myit masin lungpa, bawnu hta bang
matsing da ga!!

Nang ngai marai hkum dek a hkam sha ai lam, byin mayu ai lam, Amyu sha
ni a tsinyam lam ni hpe, Dai Yehowa Karai Kasang kaw tang shana, tsun
dan na grai ahkyak nga ai. Anhte shada da sha tsun jahta ai hte sha
bungli nbyin nga ai. Lam shagu hpe shabyin ya lu ai gaw Karai Kasang
rai nga ai hpe a dum nga ga.

Labau hta Shanchyang Negro Hpunau ni a asak hkrung lam hta Shanhpraw
ni a dip lu dip sha, tara rapra lam nnga, mayam prat jamjawu tsinyam
hkrum sha ai ten, myit mada shara nnga mat sai ni zawn hkrum sha hkam
sha let sak hkrung lai mat wa sai. Dai ten hta Anhte Shan Chyang amyu
sha ni aq myit mada shara, kam hpa shara, ninghtoi gintawng Madu
Yehowa Karai Kasang nga ai. Shi chyu sha anhte a lawt pru na chyinghka
lam, myit mada shara, kamhpa shara, shingbyi lung hkrung rai nga
ai....., ngu ai Shanchyang Karai Masa(Black Theology) hte myit sharawt
zinlum dat ai hte tatut hkan nang hkan sa sak hkrung lai wa ai a
chyeju, mahtai gaw..., daini mungkan hta anhte myi chyaw mu chye nga
ga ai, shanchyang amyu sha ni a asak hkrung lam hpe sharin la lu nga
sai. Mungkan hta Yungwi Shingni lam hta shanchyang amyu sha ni shara
la nga ai, Ginsup lam hta shara la nga ai, Hpyen majan hpyen la, hpyen
Du jaubu kaba ni hta shara la nga ai, American Gumsan Magam, Mungkan a
mungmasa ningbaw ni hta shara la nga ai, Wenyi makam masham ningbaw ni
hta shara la nga ai..etc... ahkyak ai shara shagu hta shanchyang amyu
sha ni n lawm n mai, n nga n mai, Dai Yehowa Karai Kasang sharawt
shatsaw dat ai, shalawt dat ai hpe hkam la , hkam sha nga lu manu ai.
E... Dai Shanchyang Amyu sha ni aq Karai Kasang mung daini anhte
Jinghpaw Wunpawng Amyu sha ni a KARAI KASANG rai nga ai n rai ni?
Karai Kasang hta n byin mai ai lam hpa nnga ai. Karai Kasang anhte
Jinghpaw W.P amyu sha ni hpe mung tsawra nga ai , mu nga ai, chye ya
nga ai re. Raitim, anhte hta lama mi ra nga sam ai nhtenn !! Dai Madu
Yehowa Karai Kasang hta mahtai nga nga ai....

Dai majaw, Tsawra Nu Wa Hpu nau, Jinghpaw W.P amyu sha ni e..., Myu
Tsaw Share Shagan, Hpyen Num Hpyenla, Du Gyi Salang, Ningbaw Ningla,
myitrum manaw manang ni yawng hte e...Myit n kaji ga, myit n daw ga,
hpa myit hkum tsang, hkum hkrit, Shagri N Kaji Ga!!, Shagri N Brep
Ga!! ngu ..... n gun jaw dat mayu nngai....!!!

Sr. Hpauje Kam Li
Trinity, Manila, Quzen City
Phillippine