Labau Kadun
Moi Ninggawn Wa Magam a kanu yan kawa rai nga ai Chyanun yan Woishun gaw kasha hpe ning ngu nna ga htet da ai da. “Ngai sha e, an ningnu yan ningwa a moimang hpe lup makoi mayang ai bungli galaw u. Shaloi hka kata na hkrung mahkrung hte hkarang kawng ntsa na tu matu ni yawng hpe uphkang ai Ninggawn Wa Magam nang tai na re. Ningnu a madoi chyu hpang kawn lwi shaya ai ntsin gaw Chyanun tsapyi tai nna lu lu na re,”ngu nna tsun htet da ai. Dai shani kawn Ninggawn Wa Magam hte Numraw Ma Ja Bang gaw Chyanun chyu lu hpang sai.
Dai hpang Majoi Shingra Layang Ga kaw, Kinnun jan Kinnai ngu ai Matsaw Du jan gaw npun yi kaw shi a shingkyit hte dumsi hkam lu ai da. Dai shaloi dumsi gaw, “ngai hpe hkum sat sha et, ngai Chyanun chyu matsi lap tsun dan na”ngu ai da. Dumsi tsun ai gaw, “ningdung de lap lali tsawm ai gaw lashi, ningpawt gaw tsi moi matsi” ngu tsun dan ai. Dai shani kawn Chyanun chyu tsa matsi lu hpang ai re da. Tsa jap hpe gaw Jinghpaw wunpawng sha ni shadu lu ai lam nna ga ai.
Tsa Matsi Kaw Bang Ra Ai Amyu Hpan Ni;-
(1) Lupmun Lap
Lachyum: :Lupmun lap gaw masha hkumhkrang a hpyi ntsa hte hpyi kata na ana hpe shamai ya ai. Sai n-gun tsi mung re. (Ya hpang daw de gaw, ginra masa hta hkan nna tsi mawan tai ai baw lap law law hpe gayau nna jailang wa sai.)
(2) Majap Sharaw
Lachyum: :Majap Sharaw gaw masha hkumhkrang kaw na ana kanu ni hpe gawt shapraw kau ya ai. Tsa pa kaw mung, grai jap ai majaw ana zinli kanu ni n sa kap lu ai.
(3) Shanam Gaihpu
Lachyum: :Hkumhkrang a kraw kata hta, hpye ai ana ahkya hpe shamai ya ai.
(4) Nhpraw N-gu Shadung
Lachyum: :Lupmun lap, majap sharaw hte shanam gaihpu ni kaw na tsi nsa ni hpe shadung kaw gumchyak tawn ai lachyum re.
Tsa Shadu Ai Hkrang
(i) Nbaw n-gu hpe shadu jahkut nna, jahtai kaw matsi mun gayau shakawp da ai.
(ii) Nhtoi (4) ya daram rai yang, shingkrang de htawt bang ai.
(iii) Shingkrang de bang ai hpang nhtoi 4,5 ya rai yang tsa pa tai sai hte pyi lu mung mai sai re.
(iv) Tsa a nsa ja ai hku hpe gaw shingkrang pawt de hkyen jahkrat da ai. Dai hpe tsa hku ngu ai rai nna, dai tsa hku hpe gaw asak naw kaji ai ni hpe nlu shangun ai.
Tsa Lu Ai Rit Kawp
(i) Tsa pa hpe kawa nhtawt kaji hta bang nhtawm, hka hkunglum hte gayau nna kungbat hte abyip hkyen lu ai.
(ii) Masha kaba rai yang kawa nhtawt kaji lahkawng sha lu ai.
(iii) Ma kaji ni hpe gaw hpungsit sha jaw ai.
