* Ngai Sutdu n rai,
Matsan chyahkrai mung n rai;
Laikasi ni lahku;
Laikayan ni mahkyu,
Gamgu dai hkra tut tut garang mayu.
* Ngai Suthti n rai,
Ja gumhpraw n suh nngai;
Raitim ngai n matsan,
Gumgu rau myu hpe shapan;
“Gumgu mat jang, Amyu mat na,”
Ngai nachying tsang laq we ai.
*Ngai Hpyenjaubau n rai,
Laknak kaba n lu nngai;
Pyenli, modo, amyawk n lang,
Hpyen luksuk mung n lu nngai;
Ngai gaw Gamgu,
Maisau palah sha mi lu;
Magrau grang grang palah gap bun,
Hpyen hpe mangaq lu we ai.
*Ningbaw Ningla ngai n rai,
Matsun Du mung n rai nngai;
Langai hpe pyi awn lu n rai,
Raitim Ngai Gamgu,
Laika hti shawa ngai lu we ai.
* Ngai Tsidu kaba n rai,
Tsi lajang na atsam n lu nngai;
Raitim ngai Gamgu,
Gawngkya masha lakawn mayu;
Shawang amyit kabrat li ai.
*Share Ninghkring ngai n rai,
N share n shagan lu nngai;
Shanaq shagu Ngai Gamgu,
Yup n lu shanaq ni lawq la ai;
Hkrai shingtai garen laq nngai.
*Ngai shingni hpring masha n rai,
Masha shazai mung n rai nngai;
Ngai Gamgu, Nang hpe shalan lu,
Sumrai hte shangwi,
Manihpa hte shakre lu we ai.
*Ngai lawhpah myit marin,
Tinggyeng amyit n rawng nngai;
Ngai Gamgu,
Myu a, ‘Sailam’ shim dah mayu.
Shanglawt Tsing ( 1.11.2015)
