A ten du sai

Lani mi Ningbaw Kaba Lahtaw Zau Seng hte Gen. Kriangsak Chomanand (Thai Commander-in-Chief) hkrum shaga ai shaloi Gen. Kriangsak san ai hta, nanhte gaw awmdawm ahkaw ahkang lu na matu gasat ai i, nga ai. Ningbaw Kaba bai htai ai hta, Myenmung hpe British ni uphkang wa ai kaw na shanglawt jaw sai. Raitimung grau matse ai Myen asuya a kata de shang mat saga ai. Dai majaw Myenmung ting hpe shalawt la nhtawm, htingbu mungdan ni hte ngwi pyaw simsa nna mahku mahkau shangang shakang lu na matu yaw shada ai majaw KIO ngu shamying ai lam sanglang dan ai shaloi, General gaw, nanhte hte ganawn mai sai, nga ai.

--------------------------------

PYILAN:- Dai ni na mali nhtoi kaja hta nam-up sa jahta lawm ai myitsu salang ni gaw nam na ashu ashan malen pyen u ni hkrai rai ga ai. Raitimung, grup yin kaw shanu nga ai shinggyim myusha ni a matu mung malawm magawm myit shalawm ya ai jasat hte ningmu garan kachyan hkat ga, ngu mayu ai. Shanhte a ntsa myit tau ya ai shawang myit hpe anhte shawng madun lu ai rai yang aten galu hta ngangkang ai jinghku jingyu ni byin tai wa lu na re.

Ganawn mazum lam hta anhte gaw kadai hpe mung masu magaw, roi sha, mya sha ai akyang n rawng ga ai majaw dai zawn re akyang rawng ai ni hpe ja ja ninghkap ga ai. Mungkan chyam pyen hkawm nna hkaja wa yu ai shaloi, masha nkau gaw matse labye myit hte kaga amyu ni hpe roi sha, shamyit kau wa masai. Tara kade n lang timung, roi sha katut ai ni mahtang yak ai hpe jan lu ai lam n nga, magrau grang ai myit n rawng, Karai Kasang hpe malap mali re ai ni chyawm gaw mungkan kaw shanhte a myusha lam yan shamat sha kau ai amyu mun sen lam nga wa masai.

Myenmung a labau kaw Pyu, Kanyan amyu ni nga wa ai lam mu wa yu sai raitim shanhte gaw myit kya ai hpan ni re majaw shanhte a amyu hpe Myen ni a kata de shabyawng bang la kau hkrum manu ai. Dai hte maren moi shawng de lawu ga na masha bawsang nkau hpe Myen amyu de shabyawng la lu magang sai shaloi, British ni Myenmung hpe sa zing la ai marang e, shanhte a amyu mying bai danhkung wa lu masai. Raitimung Myen asuya gaw, sai kaw nan matse labye myit rawng nga ma ai majaw shanglawt lu ai shani kaw nna bum nga masha ni hpe shamyit kau na masing bai lang wa ai hpe dai ni na ten hta asan sha jawm mu nga ga ai.

PRANGTAI:- Salang Pyilan a ningmu hpe tsepkawp madi shadaw ai. Ja chyum laika kawYuda amyu ni gaw shaning tsa lam mayam amyu byin wa ma ai hta n-ga, mungkan majan lahkawng ten hta German Nazi hpyen ni e, kade sat sharu kau hkrum wa masai raitimung, magrau grang ai myit rawng nna tinang a amyu hpe manu tawn makawp maga wa let, Karai Kasang kaw ngangkang ai kam sham myit hte manoi manat wa ma ai majaw hpang jahtum shanhte gaw ngangkang danhkung ai mungdan gaw-gap la lu masai.

Gen. Than Shwe myit lawm ai hta hkan nna, Liberation Tigers of Tamil Eelan (LTTE) rawt malan hpung hte KIO a shingdu lam hpe gindaw yu ga. LTTE hpe 5 May 1976 shani Velupillai Prabhkaran woi awn hpang wa sai. Grup yin kaw na jawm madi shadaw la ai madang hta hkan nna LTTE gaw nbungli kade, nammukdara lai di ai sanghpawli kade, maigan mungdan hkan na laknak ntaw ntsang kade mari lu ma ai. India kata kaw hpyen training dabang 32 hpaw nna hpyendap hpe shachying wa ma ai marang e, hpyen n-gun sen lam maden wa lu ma ai. Dai zawn rai n-gun kaba wa ai hte maren, shinggyim masha ni n ra ai hta n-ga, Karai Kasang n ra ai bungli ni galaw wa masai. 1991 ning hta chyeju madu rai nga ai Indian Prime Minister Rajiv Gandhi hpe gyam sat kau ai zawn, 1993 ning hta tai hpyen rai nga ai Sri Lankan President Ranasinghe Premadasa hpe mung gyam sat kau masai. 378 lang suiside attack galaw ai kaw nseng n ang ai mungmasha ni a asak law law si hkrum wa masai. LTTE gaw shawng nnan awmdawm ahkaw ahkang lu na matu gasat wa ma ai raitim, 2002 kaw Regional Autonomy madang de shayawm nna asuya hte bawngban ai kaw Norway mungdan gaw mediator hku shang lawm ya wa sai. Raitimung, lawhpa ai ni gaw, lu nga sai hpe sum kau chye ma ai rai nna, majan bai matut gasat wa masai.

Dai kaw nna India hte USA lawm ai mungdan 30 jan gaw LTTE hpe terrorists hku masat kau nna LTTE hpe madi shadaw wa ai masing dawm kau let Sri Lankan asuya hpe mahtang garum madi shadaw wa masai. Mungdan nkau kaw na majan hpaji ninghkring ni mung shang lawm wa masai. Shing rai Sri Lankan asuya gaw n-gun kaba, hpaji kaba, zai ladat kaba hte gasat bang wa ma yang, LTTE gaw 26 ning tup n-gun kaba hte gasat wa ai hpang 16 May 2009 shani naw ngam nga ai hpyen hpung marai 11,664 gaw tsep kawp laknak jahkrat ai hte asum hkam kau manu ai.

Dai zawn rai n-gun kaba ai rawt malan hpung hpe asuya kaw na tsep kawp dang kau lu ai hpe mu ai shaloi, Than Shwe gaw na chying myit sharawng nna Sri Lankan de sa nhtawm asuya hpyendap lang ai ladat ni azin ayang hkaja la nna dai ni na ten hta KIO hpe gasat ai kaw wa lang nga masai.

Dai ladat ni gaw;-
1. Rawt malan hpung hte mungmasha a lapran kaw kaning re ai matut mahkai lam mung n nga hkra ladat myu hkum sumhpa hte shingdang kau ai.
2. Rawt malan hpung shada a lapran, mungmasha shada a lapran, rawt malan hpung hte mungmasha a lapran kaw shada ntsen, nju ndawng lam byin pru wa nna kahkyin gumdin lam hten run mat hkra jut shagu kaw sumprat hkan bang, shang shalau ai.
3. Mungmasha kata, rawt malan hpung kata kaw shiga hkum sumhpa shang la ai.
4. LTTE a ja gumhpraw shang lam yawng hpe hkan jahten pat shingdang kau ya ai.
5. Majan hta lahkam langai a hpang langai zing la lu ai shara ni hta hpyen hpung jahkrat wa ai.
6. Mungmasha ni myit daw myit hten nna n jan lu hkra roi rip dam ari jaw ai hta n-ga, shanhte a ja gumhpraw arung arai, u wa yam nga, yi sun hkau na ni zing la ai majaw mungmasha ni gaw asak lawt lu daw rawt malan ginra de hprawng shang hkra galaw ai.
7. Dai ginra de lu sha nshang hkra grup yin hkarang lam, hka lam yawng hpe pat shingdang tawn nna, media hku LTTE hpe jawm jahpyak ai nga yang sumtsan mungdan hkan du nga nna shata shagu jawm garum nga ai jinghku ni a myit hta mung terrorists ni hpe n kam garum ai myit rawng wa hkra galaw ai.
8. Hpyen hpung ni lu malu laknak kaba ni hte shani shana marang htu ai zawn sharu bun ai. Helicopter, jet nbungli ni rocket, bawm ni hte sharu bun ai nga yang, mungmasha ni gaw kawsi hpang gara myit daw hten, awai la n lu sai hpe mu ai rawt malan hpung a myit mung hkan daw hten mat hkra galaw ai. Hten run mat ai myit hpe sharai la nlu sai majaw hpang jahtum LTTE gaw aten galu arang shaw ap nawng wa ai hpyen hpung ni a asak, myusha ni a asak yawng kaman lila asum hkam kau shangun ai. Mahtai gaw ngangkang ai myit hpe shayawm kau ai hta n-ga, hpan wa madu Karai Kasang n lawm ai majaw sum mat masai.

Myenmung kaw nga pra sa wa nga ai amyu bawsang ni hta na Wunpawng myusha ni gaw gara myusha hte mung nbung magrau grang nna dawdan gwi, galaw gwi ai amyu ni re. Jak laknak kaba lang nna maigan mungdan ni hpe hkan zing la mat wa ai British hte Japan hpe gara hku gasat shingdang wa ai lam maram yu yang, myit majan hte laknak majan ni hta ngangkang ai myit jasat lang wa masai. Shing rai dai ni na ten hta KIO hte Wunpawng Myusha ni mung hpu ba hpu shawng ni a kasi lang nna myit majan, laknak majan hpe shen maram nhtawm gasat nga ma ai.

LTTE hta lakap nna KIO a ntsa kaw dinglik yu ai shaloi, “I” ngu ai gaw awmdawm ahkaw ahkang hpe madi madun ai re. Lani mi Ningbaw Kaba Lahtaw Zau Seng hte Gen. Kriangsak Chomanand (Thai Commander-in-Chief) hkrum shaga ai shaloi Gen. Kriangsak san ai hta, nanhte gaw awmdawm ahkaw ahkang lu na matu gasat ai i, nga ai. Ningbaw Kaba bai htai ai hta, Myenmung hpe British ni uphkang wa ai kaw na shanglawt jaw sai. Raitimung grau matse ai Myen asuya a kata de shang mat saga ai. Dai majaw Myenmung ting hpe shalawt la nhtawm, htingbu mungdan ni hte ngwi pyaw simsa nna mahku mahkau shangang shakang lu na matu yaw shada ai majaw KIO ngu shamying ai lam sanglang dan ai shaloi, General gaw, nanhte hte ganawn mai sai, nga ai.

LAGANG:- Salang yan tsun ai ningmu gaw, rawt malan hpung ni hte mungmasha ni gara de matut sa na hpe pyending nan ya ai lachyum pru ai majaw yawng a matu akyu nga sai. Myen asuya gaw Karai Kasang n ra sharawng ai lam kaw ding yang hkawm wa sai majaw shanhte a lam gara kaw wa htum na ngu ai gaw Karai Kasang a myit sha rai na re. Myen a labau kaw rai nbyin yu ai dai ni byin wa sai. Yen nlu ai hpang jahtum majan hte ginchyum dat na ATEN DU SAI. Karai Kasang kaw ja ja kyu hpyi nhtawm, awngdang na hpe kam let gasat sa wa ai kaw shingdu de na lai ladat amyu myu hte atsam htum jawm garum madi shadaw la ai marang e, teng teng awngdang wa na re.

Puk Dun

By JPKS