America de du ai Wunpawng Myu sha ni hpe chyeju ginlen shalai da ya ai Kaji, Kawoi, Kanu, Kawa ni hte Karai a chyeju lakung lakap hte, lakang tai lai wa sai makam hpung, wuhpung ni hpe myit dum shingran ai hte chyeju dum ai.
“ Moi chyaloi nhkoi na hpe dum mu, Lai mat wa sai prat ni hpe aru yu mu; Na nwa hpe san u, shi tsun na ra ai, Dingla ni hpe gawn yu u., shanhte hkai dan na ma ra ai.” ( Tara Jahprang 32:7)
1985 Ning, February (3)ya shani e, Sarama kaba Nhkum Nang Mai, Slg. Zinghang Tang Gun ( Robin Nan), Slg. Zinghkang Brang Seng ni woi awn let, Kachin Christian Association of America ( KCAA) ngu Los Angeles, CA hta hpaw ninghtan wa sai. Myu sha ni hpe zinlum lai wa sai.
1991, Pasadena, CA hta Kachin Baptist Fellowship ( KBF) ngu hpaw ninghtan la sai hte nawku daw jau wa sai hte myu sha ni hpe chyeju jaw lai wa sai.
1997 hta shawng ningshawng lang na Kachin Christian Family Camp hpe Silver Spur Conference Center, Toulumne, CA hta galaw hpang wa sai. Dai hpang Nta madu tai nga ai California kaw nna, kaga mung daw rai nga Florida, Nebraska, Texas ni hta mung, Kachin Christian Family Camp hpe shaning shagu nhprai ai sha galaw lai wa saga ai.
2006, Camp Hoblitzelle, Dallas Texas, hta , DFW Kachin Baptist Church ni Nta madu tai nna, 10th lang na, Kachin Christian Camp Dabang hta, KACHIN AMERICAN ASSOCIATION ( KAA) hpe hpaw ninghtan dat lu sai.
2006,Kachin American Assiciation ( KAA) kaw nna lit la let, Malaysia du nga ai Wunpawng Myu sha ni, 3rd countries de Refugee Status hte tara shang pru sa lu na matu, UNHCR Malaysia de tara shang ahkaw ahkang hpyi shawn sa wa na matu, Kaji Kawa Du wa Howa Ja La ( KNO), Slg. Zinghang Robin Nan (Kachin Christian Association of America) hte Slg.Shadan Zau Awng ni hpe Malaysia de lit shatsam dat saga ai. Malaysia du Kachin Development organization ( KDO) ni hte jahkrum la nna, UNHCR Malaysia de chyinghka akawk hpyi shawn hpang wa sai.
2007 hta Kachin American Association ( KAA) kaw nna matut woi awn let, Wunpawng Myu sha ni America de matut du shang wa lu na matu, seng ang ai Church World Services, Lutheran Immigration and Refugee services ( LIRS) ni hte ta gindun nna, Rev. Dr. Yoba Lasaw hte Sara Labya La Seng yan gaw UNHCR de, Kachin Refugee Committee ( KRC) ni hte jawm bawng ban la nna Karai Kasang a chyeju san san hte sha, yawng a matu ahkaw ahkang hpyi shawn lai wa sai. Karai Kasang a chyeju hte sha, UNHCR kaw nna chyinghka hpaw ya ai hte, Malaysia du Wunpawng Myu sha ni, USA hte Mungdan kaba law law de ndut ndang du shang wa sai.
Bai Malaysia, Thailand hte Myanmar kata kaw ngam ngam nga ai Myu sha ni USA de du shang wa lu na matu, 11 th lang na Kachin Christian Family Camp, Philadelphia , 2007 hta, AFFIDAVIT OF RELATIOSHIP (AOR)hte REFUGEE INTEREST ni hpe, seng ang ai Asuya de hpyi shawn lu na matu woi lajang galaw lai wa saga ai. Dai majaw anhte Wunpawng myu sha ni Refugee Status hte USA hte Mungdan kaba ni de ndut ndang du shang nga pra wa lu sai rai.
2012 Ning hta Myu sha hte bawngring lam hta, dawjau woi awn sa wa lu na matu, Kachin American Association ( KAA) kaw nna woi awn let, Omaha, Nebraska e galaw ai 16th lang na Kachin Christian Family Camp Dabang hta, Myu sha lam hta zinlum lu na matu KACHIN ALLIANCE ( KA), USA hpe shangai shaprat dat ya lu sai rai.
Ka ai.Rev. Dr. Labya La Seng
