Jinghpaw Wunpawng Htunghking hta Mayu, Damaq, Kahpu Kanau ngu ai gaw ahkyak htum re. Numwawn Numla ai lam htaq Damaq ni gaw Mayu Du ni hpe jaw ya ai ja hpaga hpe HPU ngu tsun ai.
Mayu Du ni hku nna Damaq ni hpe bai jaw ai hpe sharung shakau ngu tsun ai. Sara Kaba Ola Hanson gaw anhte a ndai ahkyak ai htunghkring hpe akrit akrai chye na ai wa re.
Dai re majaw Chyum laika hpe gale ai shaloi Mayu Du ni hku nna jaw ya ai Sharung Shakau a lam hpe Ningpawt Ninghpang 30:20 hta mu lu ai.
NN 30:20 Dai rai nna Lea gaw, Karai Kasang ngai hpe sharung shakau kaja jaw ni ai; ya chyawm gaw, nye a madu wa a matu shadang sha kru shangai ya se ai rai nna, shi ngai hte rau anga nga na sai, nga nna shi hpe Zebulun ngu shamying wu ai.
Mayu, Damaq ngu ai htunghking n nga ai Myen ni English ni a Chyum Laika hta dowry (HPU) Let Hpoit (လက္ဖြ႕ဲ) sha lawm ai. Rai ti mung Sara Hanson gaw anhte a Mayu ni hku shaman dat ya ai htunghking hpe atsawn chye ai majaw HPU ngu na malai Sharung Shakau nga nna lang da ai.
Dai re ai majaw anhte Jinghpaw Wunpawng sha ni a htunghking hku yu ai shaloi Karai Kasang gaw Mayu Wa zawn shaman ya ai wa re ngu mu lu ai.
Sharung shakau ngu ai gaw Mayu du ni hku nna Damaq du ni hpe shaman nna jaw ya ai kungdawn kumhpa hpe tsun ai. Ndai sharung shakau shingnoi hta shinggyim masha ni a npawt nhpang ra kadawn ai sut ni rai nga ai hkai nmai nai mam li, nhtu, di, hkra, Sali wunli, mayat maya lam, buhpun palawng ni bawn bang maq ai.
Ndai hkinghtawng gaw matsaw ningtsa Lamu Madai ni hte Mayu daw ai kaw na lang hkrat wa ai lam rai nga ai.
NN 30:20 hta mung Karai Kasang gaw Lea hpe sharung shakau kaja jaw ya ai hte shaman chyeju Sali wunli hkamla lu ai lam hpe mu lu ai. De a jaw e Lea a hkritung kaw nna Yuda hpe shaprat ai. Yuda sai kaw na Dawi, Dawi kawn Yesu Hkristu yu hkrat wa ai hpe mu lu ai. Dai majaw Karai Kasang gaw Mayu du maga nga nna Lea hpe shaman ya ai wa re hpe mu lu ai.
Rai ti mung Yesu Hkristu gaw anhte a Dama wa she re, Mayu wa n re. Yesu Hkristu gaw Dama wa, La Nnan re. Yesu hpe kam sham ai anhte Hkristan ni gaw Yesu a Num Nnan ni rai ga ai. Yesu Hkristu bai du sa ai shaloi Sungsing hkungran poi kaba hta hkungran poi shang na ni rai ga ai (Shingran 19:9).
Yesu gaw shi a num nnan kam sham ai ni hpe grai tsawra ai majaw Wudang Ntsa hta sai hkaw let, si hkam nna manu jahpu jaw let mari la sai. Kam sham sai Hkristan ni gaw Yesu Hkristu hte Liklai galai sai ni re. Yesu Hkristu a Liklai gaw Chyoi pra ai Wenyi nan re (Yawhan 14:26)
Jinghpaw Wunpawng sha ni a htunghkring hta mung La nnan ngu ai gaw Num nnan hpe Hpu Ja Hpaga law law jaw nna hkungran la na matu ri nhtu lu ai wa hpe tsun ai. Hkungran ai poi hta kumbang shalai ai shaloi mung u, wa ni hpe htau nna sai hkaw let hkungran la ai.
Damaq ni gaw La Nnan tai na matu Num nnan hpe manu shadan nna Hpu Ja law law jaw yang she La nnan mai tai nga ai. Dai hte maren Yesu gaw Wudang ntsa hta sai hkaw let gawng malai tai nna anhte hpe mari la ai Damaq wa rai nga ai.
Lahta e tsun lai wa sai lam ni gaw, Karai Kasang gaw Mayu wa, Yesu gaw Damaq wa ngu ai hku sawn la na matu n re. Karai Kasang gaw Kawa langai hku nna Mayu, Daumaq yawng hpe hpajang ya ai wa, shaman ya ai, shabyin ya ai wa re. Karai Kasang gaw Damaq wa hku nna Shi a kasha Yesu hpe dat ya nna manu jahpu jaw let Num Ningnan kamsham ai ni hte Hkunran na matu tsawra myit kaba hte gingjang lam tam ya ai wa rai nga ai. (Yawhan3:16)
Laklai ai lam gaw Yaku a kasha 12 hta na Karai Kasang a sharung shakau hte shaman dat ai Lea a hkritung kaw na hkrat ai Yuda, Yuda a lakung kaw na she La nnan Hkyela madu Yesu shangai wa ai. Yuda lakung she Karai Kasang lata la ai amyu, daini du hkra nga ai Israel mungdan hpe up ai amyu tai wa sai. Ngam ai lakung ni gaw dam mat ai amyu tai wa ai.
Daini chyum hpaji hka ja ai ni Contextual Theology (Shingra, Buga, Htunghking hte htap htuk ai Karai Masa) grai ahkyak ai nga tsun shajang ga ai. Jinghpaw Chyum Laika hpe akrit akrai hti hkaja magang Sara Kaba Ola Hanson gaw contextualized galaw da ya ai chyalu re ai hpe mu magang, mau magang rai ai law.
Dai majaw Sara Kaba Ola Hanson hpe nachying wa chyeju dum ga ai hte Jinghpaw Wunpawng sha ni a htunghking gaw Karai Kasang a mungga hpe grau nna chye na hkawn hkrang shangun nga ai law.
By : Sara Plawng Naw tawng
