American missionary Sarakaba Adoniram Judson hte mung masa.
Sara Kaba Yudatan a lam hpe Janet hte Geoff Benge ka da ai “Adoniram Judson: Bound For Burma” ngu laika buk hpe lakap nna,laklai ai ningmu nkau hpe garan gachyan dat ai.
1) American ni shanglawt lu ngut ai hpang 36 ning hta Ingalik rau majan bai byin ai War of 1812.
2) Tsaban 18 kaw nna American ni Asia dan ting ngu na daram de sasana Sara ni sa ma ai.
3) India hku nna Ingalik colony ngu na hta East India company ngu ai (Multi-National Corporation) hku nna Mungdan hpe up da ma ai re.
4) Sara Kaba Yangon kaw nga ai aten hta Bodaw Paya prat kaw nan Myen Asuya kata kaw corruption (mayun kunhpa) grai nga ai hpe mu lu ai.
5) Bagyidaw ahnar zing na tingyang lung wa ai shaloi kahpu kanau nkau hte machying jinghku hte mung shawa yawng pawng yang 14,000 jan sat kau ai da.
6) Hkaw Hkam ningnan re majaw Bagyidaw gaw Amara Pura kaw na Ava de htawt nna mare de ai. Ya Yangon kaw na NPT de mare de ai hpa. Madu na madu hkawhkam hku mu ai ga re.
7) Myen Du ai “Aba” ngu ai ga si a ninghpawt gaw Mandalay na Let Mayun htawng e Si-Dam jaw hkrum ai ni hpe Hkang ai Ba-Gwet Tha ngu ai warden ni Ningbaw hpe “A Hpa” ngu shaga ai psychology kaw na hpang na ngu mu mada ai.
8 ) Myen ga shaga ai Hkristan ni shawng ningnan nga ai gaw Yangon, Mandalay nre sha Chittagong kaw re nga ka da ai.
9) Sarakaba Judson gaw zingri zingrat nau hkrum nna lang hte lang shi hpe bai shaga la na matu Karai Wa hpe akyu hpyi ai da.
10) KBC hku nna 1996 hta manau nau nna Manau Sadung jun da ai hkau na Pa gaw Moi Sara Kaba hpe Mandalay htawng na htawt nna grau shim ai shara de ngu nna sa da ai Aung Pinle mare rai nga ai.
11) Bagyidaw Arakan hte Tannintari hte Lawu Myen mung hpe sum ai majaw East India Company hpe ap ya ai majaw daini du hkra Arakan na jarik ginra ni hta Strike Police ngu ai Majan-shang ai Balik tawn nna Hpyenla ntawn ai re ngu chye na wa ai. Mahtang gaw Myen ni a gaiwang re ngu masat ai ga re.
12) Bagyidaw gaw East India Company hpe majan e sum ai majaw Yandaboo Agreement hte lawu Myen mung hte majan hka wa ai lam hpe Sara Kaba Judson ga gale ya nna ndai agreement hpe Myen hku ka ya ra ai majaw htawng kaw na lu pru wa ai re. Ndai aten hta Myen Hkawhkam Bagyidaw hku nna Sara Kaba Judson hpe Myen Asuya maga a matu zatsam ai re.
Ahkyak htum hkaja lu ai lam gaw:
Sara kaba lawt wa ai hpang East India Company hku nna Myen Hkawhkam hte ginrat nna agreement galaw na matu bungli zatsam ai shaloi Sara Kaba hpe gumhpraw ra ai daram hpyi shangun ai. Dai aten hta East India Company gaw Mungkan hta kaba htum company re, hpyen dap hte hka dap nga ai Company re.
Sara kaba hpyi shawn ai gaw Myen hte galaw ai agreement hta religious liberty ngu ai wanglu wanglang Karai Kasang hpe kamsha lu na hte Kabu gara shiga hpe Ava Kingdom kata e hkaw tsun lu na ahkaw ahkang sha hpyi shawn wa ai hku re.
Ginchyum dat ga nga yang, Myen mung na nawku hpung law law lang ai “Mung Up ai Asuya a tara ni hpe hkan nang hkan sa u” ngu ga rai ma ai.
Teng sha tsun ga nga yang Sarakaba Adoniram Judson sha Bodawpaya hte Bagyidaw ni a ga sha madat ntara ai upadi hpe hkan nang nga yang Nang ngai ngu ai ni Hkristan tai wa lu na lam nmu ai.
Tengman ai lam hta tsap nna hte teng ai labau hpe hkai ga.
by.FB
Book summary by Gumsan Nsang
