Shing gyim masha shagu hta tinang the seng ai htung hking lu ai hkrai rai nga ga ai. Tinang a htung hking hpe n chye ai majaw she nnga ai shadu na re. Raitimung amyu langai gaw shi the seng ai htunghking gaw nga chyelu re. Rai yang kade a htung hking kaja htum, kade a htung hking n kaja htum rai ta? Ngu na lam nga ai. Ginru ginsa yu wa ai hta hkan nna nkau mi a htung hking gaw labu palawng atsawm pyi n hpun ai , nkau mi gaw, hpung ai pyi gahtap gala rai nna hpun ai. Grai tsawm htap ai htung hking ni nga ai. Ntsawm n htap ai htung hking hpe mung nmai shamat ai ngu nna dai hpe woi shatsaw ai hku nre sha, tsawm htap ai maga de sharai la nna, bu hpun sa yang, mungkan de dan dawng ai ni mai byin na re. Raitim htap htuk manu dik ai htung hking hpe amyu langai ngai a htung hking the shingdaw yu shabung yu nna, n bung ai shaloi, tinang a htung hking hpe galai kau mayu ai , masha ni the bung hkra shabung la mayu ai lam ni gaw, kachyi mi mung nmai galaw ai ladat re. Htunghking hpe sharawt ai n re sha, jahten ai wa she rai nga na ndai.
Ndai zawn htung hking hpe jahten ai kaw Wunpawng sha ni hta law malawng gaw maigan du nga ai Wunpawng sha ni kaw mu mada nga ai. Nang hpe kalu kaba dik nga sai mungdan ni de du na ahkang, nga na ahkang jaw ai Karai Kasang a ra sha rawng ai lam gaw, nangdu nga ai mungdan na myu sha ni a htunghking hpe yu kaba nna, na htunghking hpe shamat kau na matu n re. Nangdu nga ai shara hta nang hpe Karai Kasang jaw da ai htunghking hpe dan dawng hkra nmat hkra makawp maga nga na hpe ra sharawng ai re.
Mungkan masha ni yawng a htunghking hta anhte Wunpawng sha ni a htunghking gaw grai tsawmhtap dik ai htunghking re ngu hkam la mai nga ai. Hpa majaw tsawm htap dik ai lam hpe,
Buhpun palawng hkik hkam tsawm htap ai.
Shachyen shaga ai htunghking
Asak kaji kaba hta hkan nna hkung ga la ra ai lam.
Manau nau ai, Htawng ka ka ai, kaji byu ai, Sam we we ai ta gaw gaw ai amyu ni re.
Jahtawng htu mying shamying ai amyu,
Htung hking bu hpung palawng tsawm htap ai. Nu num ni a da labu ni gaw, maka grai tsawm ai, grai ngang ai ( Jean the bung ai )grai yak la ai maka ni a majaw, masha ni kanan (Copy ) galaw la na n loi ai. Nu num ni a gumhpraw palawng ni gaw tsawm htap la ai the gumhpraw jet the galaw jang grai manu dan la nga ai. Ya prat modern hku chywi da ai labu palawng ni gaw grai manu kaba nna, tsawm mung grai tsawm ai majaw, madang nga ai hpun palawng ni rai nga sai. Wa la ni a Jinghpaw hking gaw grai manu n dan na zawn san ai rai tim, Gumhpraw n htu Soi n hpye ni gaw manu grai kaba ai ni re. Num, la hking man mi gaw, S$ 1000 jan dan ai re.
Shachyen shaga ai htung hking gaw, kaga Miwa myu sha ni hta loi li nga ai. Raitimung Wunpawng sha ni a shachyen shaga ai ladat the, grai shai ai. Wunpawng sha ni a shachyen shaga ai ladat the myu ru sai ni gaw grai dam lada nna, grai tsawm htap ai re.
Asak kaji kaba hta hkan nna grai hkungga hkat ai. Asak kaba ai wa hpe asak kaji ai wa gaw hkungga ra ai . Tsun shaga ai ladat ma hkra the hkung ga chye ai. Ndai gaw si mani ai htunghking lailen rai nga ai. Jinghku rai nna sha hkung ga ai hku n re sha, n chye ai manam wa hpe rai tim tinang hta grau kaba ai ngu shadu ai wa hpe hkung ga la ra ai lam nga ga ai.
Manau nau ai amyu.
Ndai manau nau ai lam gaw kaga amyu ni the kachyi mung n bung ai ka manawt ai hkunghking re. Mungkan hta masha law dik mai ka ai ka hkrang re. Ja Gumhpraw mung grai ma nna manau ai re majaw, mare ting jawm galaw ai manau shing nrai moi de gaw, du ni, mung du ni dum ai manau ni re. Manau myu mung n bung ai. Kumran manau, Sut manau, Pandang manau , Ju manau nga nna manau a myu myu nga ai. Gara manau mi rai rai shang nau mayu ai ni yawng gaw mai manau ai. 2012 ning miwa mung Mangshi mare kaba kaw manau ai manau gaw, Hkrumzup manau rai nna, masha mun masum kalang ta manau ai manau re majaw, mungkan hta masha law dik na ka manawt ai manau re nga ma ai. Ndai gaw Wunpawng sha ni sha lu ai ka manawt htunghking rai nga ai.
Mying shamyin ai the Jahtawng htu ai.
Jahtawng htu mying shamying ai htunghking gaw Wunpawng sha ni hpe Karai Kasang jaw da ai laksan htunghking re. Hpa majaw nga yang jahtawng htu nna, mying shamying jang mai gan amyu langai hpe tinang a myu shatai la ai. Dazik dawk la ai lam re. Myen kasha , Sam kasha, hkang kasha tinang the myu n bung ai La/Num hpe jahtawng htu nna, tinang amyu mying ( lahtaw, marip lahpai ngu langai ngai ) shamying la jang, dai kaga amyu gaw anhte a myu tai mat ai. Ndai zawn jahtawng htu da ai amying, amyu hpe Wunpawng sha ni yawng gaw, masat ya ai re. Anhte Wunpawng amyu rai jang gaw, shangai ai the rau jahtawng htu nna mying jaw ai. Ndai zawn jahtawng htu ai hpe ji jaw nat jaw ai ten hta lachyum amyu myu hku htu ai rai tim,ya hkristan rai sai ten hta gaw,shangai wa ai ma hpe Karai Kasang a lata de shawng ap ya ai. Karai Kasang ra sharawng ai hku asak hkrung na the, amyu ,mungdan, kanu kawa makyin jinghku yawng hpe pawnba lu ai ma, sam nang maka kap ai ma rai na matu Karai Kasang kaw ap nawng ai lam re.
Mying shamying ai lam mung kaga amyu ni the n bung ai lam re. Myen sam miwa kala ni a mying hpe madat nna, nambat gade tha shangai ai wa re ngu sawn la na nmai byin ai raitim anhte Wunpawng mying na ai the shi gaw la kasha nambat gade kaw shangai ai , Num sha nambat gade kaw shangai ai ngu ai hpe kalang ta chye lu ai. Ma Gam, Ma Naw, Ma la, Ma Tu ,Tang ,Yaw, hka ,Sharoi , Num kasha ni rai yang Kaw, Lu, Roi, Htu, Tawm, Kai, Pri, nga Longvo, Lachit, Zaiwa, Lisu, Riwang ni mung hkrang gaw lahta na the maren sha rai nga ai. Ndai gaw karai Kasang jaw ai mauhpa kumhpa re.
Hpang jahtum hku nna shaga mying shamying ai lam hta anhte Wunpawng Mying hta kaga chyoipra mying ( maigan Mying ) mung mai shamying ai. Hpa majaw nga yang mahkam masham lam hku chyoi pra mying shamying mayu ai ni mung nga ai. Mying ngu ai gaw, Indiviual hku mari da ai mying nnga ai. Yawng the seng ai re majaw , yawng mai shamying ai. Ga shadawn Da Wi ( David ) la mying re majaw, la kadai mung mai shamying ai. Num sha ni ( Dority Hkawn Ja ) ngu shamying tim htung hking the shai ai lam nnga ai.
Htunghking the shai nna shamying ai mying ni gaw, amyu hpe shamat kau mai ai, Htunghking hpe shamat kau n mai ai majaw, ndai lawu na hkrang hpe Wunpawng sha ni chye da nna jaw ai hku n hkan n mai, Hkan nan hkan ra ai ngu aja awa lajin dat nngai.
Wunpawng sha ni a mying shamying ai hkrang
Amyu mying ( Thinggaw Mying ) + Shaga Mying ( Jaw ai )
A B
Lama + Brang San Aung ( Jaw ai )
A + B
Lahtaw + David Brang Nan ( Jaw ai )
A + B
Amyu mying ( sh ) Hting gaw Mying a hpang e she shaga mying ka ra ai.
Ga hkyeng Zau Raw
Ga Hkyeng + Zau Raw
Hting gaw mying Shaga Mying ( Jaw ai )
Ga Hkyeng + John Zau Raw (Jaw ai )
A B
John Ga Hkyen Zau Raw
John + Ga Hkyeng + Zau Raw
B A B ( shut ai )
John Zau Raw Ga Hkyeng
John + Zau Raw + Ga Hkyeng ( Shut ai )
B B A
Jaw ai mying / Shut Ai Mying
Sara Labya Paul Naw Tawng ( Jaw ai )
Sara Paul Naw Tawng Labya ( shut ai )
Zinghang Gam Htun ( Jaw ai )
Gam Htun Zinghang ( Shut ai )
Ga Hkyeng Zau Raw ( jaw ai )
Ga Hkyeng John Zau Raw ( Jaw ai )
Zau Raw Ga Hkyeng ( Shut ai )
John Ga Hkyeng Zau Raw ( shut ai )
John Zau Raw Ga Hkyeng ( Shut ai )
Lahta na Jaw Ai hkrang the hkrak shamying nga jang htawm hpang kaba wa na kashu kasha ni my sha ni kadai mung “Amyu the Amying” hpe jaw ai hku chye lata la na ma ai.
Tsaw ra hkung ga ai Wunpawng sha ni e n gup kaw na sha myu tsaw mung tsaw ngu tsun nga na hta ta tut nan htunghking hpe jaw ai hku hkan sa ai wa rai yang she myu tsaw ai wa rai na ndai. Maigan pyi du sai ngu tinang a mying hpe n hti n htang nga hkum ka, hkum shamying la. Maigan ni a form fill up galaw jang chyawm gaw, first name, last name, surname ni hpe shi ka shangun ai hku ka jahpring ya u. Rai tim na mying hpe form kaw fill up galaw ai zawn n shamying ra ai. Amyu htunghking a mying hpe n hten hkra, n mat hkra makawp maga sa wa ga. Dai re majaw dai ni kaw nna Hpu nau wa mying shut ai hku shamying taw nga ai rai yang gaw, ya jang jaw ai hku shamying kau dat u. Mying jashut the Jahtawng n htu ga. Ma jahtawng htu ya ai hpung sara ni, hpung salang ni grai sadi ga. Na a jaw ai mying hpe, na a htung hking hpe mungkan masha yawng a man e arawng la nna Chyeju shakawn ga ngu amyu hpe tsaw ra let
A Gu Namti
